கொல்கத்தாவின் சோர்பகன் துர்கா பூஜை பந்தலில் ஏற்பட்ட கூட்ட நெரிசலில் சிக்கி உயிரிழந்தவர்களின் எண்ணிக்கை 19 ஆக உயர்ந்துள்ளது. உயிரிழந்தவர்களின் குடும்பங்களுக்கு மேற்கு வங்க மாநில அரசு சார்பில் ரூ.25 லட்சமும், மத்திய அரசு சார்பில் ரூ.2 லட்சமும் நிவாரணமாக அறிவிக்கப்பட்டுள்ளது.
கொல்கத்தாவின் சோர்பகன் துர்கா பூஜை பந்தலில் நேற்று (அக். 17) பலத்த மழை காரணமாக திடீர் கூட்ட நெரிசல் ஏற்பட்டது. மழையின் போது மக்கள் கூட்டம் முண்டியடித்த காரணத்தால் ஏற்பட்ட இந்த விபத்தில், உயிரிழந்தவர்களின் எண்ணிக்கை 19 ஆக உயர்ந்துள்ளது. மேலும் 25-க்கும் மேற்பட்டோர் காயமடைந்து சிகிச்சை பெற்று வருகின்றனர்.
சம்பவ இடத்திற்கு உடனடியாக விரைந்த கொல்கத்தா காவல்துறையினர் சிசிடிவி காட்சிகளைச் சேகரித்து விசாரணை நடத்தி வருவதுடன், கடமையைச் சரியாகச் செய்யத் தவறிய பூஜை கமிட்டி உறுப்பினர்கள், தன்னார்வலர்கள், காவல்துறையினர், ஊர்க்காவல் படையினர் மற்றும் தனியார் பாதுகாவலர்கள் உட்பட 12 பேரை இதுவரை காவலில் எடுத்து விசாரணை மேற்கொண்டு வருகின்றனர்.
சம்பவ இடத்தைப் பார்வையிட்ட முதல்வர் சுவேந்து அதிகாரிகள், இச்சம்பவம் குறித்து சிறப்பு புலனாய்வுக் குழு (எஸ்ஐடி) விசாரணை நடத்தப்படும் என அறிவித்துள்ளார். மேலும், உயிரிழந்தவர்களின் குடும்பங்களுக்கு மாநில அரசு சார்பில் ரூ.25 லட்சம் நிதியுதவியும், அரசுப் பணியில் 'குரூப்-டி' நிலையிலான வேலையும் வழங்கப்படும் எனத் தெரிவிக்கப்பட்டுள்ளது.
மத்திய அரசின் சார்பில், பிரதமர் நரேந்திர மோடி கூட்ட நெரிசலில் பலியானவர்கள் குடும்பத்தினருக்கு ரூ.2 லட்சமும், காயம் அடைந்தவர்களுக்கு ரூ.50,000-மும் நிவாரணம் அறிவித்துள்ளார். இதனிடையே, காயமடைந்தவர்களை நேரில் சந்தித்து ஆறுதல் கூறுவதற்காக மத்திய உள்துறை அமைச்சர் அமித் ஷா இன்று (அக். 18) மேற்கு வங்கத்திற்குச் செல்கிறார். முன்னாள் முதல்வர் மம்தா பானர்ஜி உள்ளிட்ட பல தலைவர்களும் இச்சம்பவத்திற்குத் தங்களது ஆழ்ந்த இரங்கலையும் வேதனையையும் தெரிவித்துள்ளனர்.