ஜப்பானின் ஐச்சி - நகோயா நகரில் நடைபெற்ற 2026 ஆசிய பாரா விளையாட்டுப் போட்டிகள் நேற்றுடன் வெற்றிகரமாக நிறைவடைந்தன. இத்தொடரில் இந்தியா சார்பில் பங்கேற்ற மாற்றுத்திறனாளி வீராங்கனை மற்றும் வீரர்கள் அபார திறமையை வெளிப்படுத்தி மொத்தம் 114 பதக்கங்களை வென்றுள்ளனர்.
இம்முறை போட்டிகளில் இந்தியா 30 தங்கம், 35 வெள்ளி மற்றும் 49 வெண்கலம் என ஒட்டுமொத்தமாக 114 பதக்கங்களை வென்று, பதக்கப்பட்டியலில் 4-ஆம் இடத்தைப் பிடித்துள்ளது. கடந்த 2023 ஹாங்சோ போட்டிகளுடன் ஒப்பிடுகையில், இம்முறை கடுமையான தகுதி விதிகள், பிளைண்ட் செஸ் மற்றும் பாரா ரோயிங் போன்ற போட்டிகள் நீக்கப்பட்ட காரணங்களால் வெறும் 168 வீரர்கள் மட்டுமே கொண்ட சிறிய குழு அனுப்பப்பட்டது. இருப்பினும், குறைந்த எண்ணிக்கையிலான வீரர்களைக் கொண்டு இந்தியா இந்த வரலாற்றுச் சாதனையைப் படைத்துள்ளது குறிப்பிடத்தக்கது.
இந்திய வீரர்களின் உலக சாதனைகள்:
இத்தொடரில் மூன்று இந்திய வீரர்கள் தங்களது விளையாட்டுகளில் புதிய உலக சாதனைகளைப் படைத்து மிரட்டலான ஆட்டத்தை வெளிப்படுத்தியுள்ளனர்:
ஆடவர் 400 மீட்டர் ஓட்டப்பந்தயம் (T44/T64): இந்திய வீரர் சந்தீப், பந்தயத் தூரத்தை 52.28 வினாடிகளில் கடந்து T44 பிரிவில் புதிய உலக சாதனை படைத்தார்.
ஆடவர் ஈட்டி எறிதல் (F37): இந்திய வீரர் ஹானி 60.79 மீட்டர் தூரம் ஈட்டி எறிந்து புதிய உலக சாதனை படைத்தார்.
மகளிர் 50 மீ. ரைபிள் 3 பொசிஷன்ஸ் (SH1): வீராங்கனை மோனா அகர்வால் 357.5 புள்ளிகள் பெற்று புதிய உலக சாதனை மற்றும் ஆசிய பாரா விளையாட்டுச் சாதனை இரண்டையும் தன்வசப்படுத்தினார்.