த.வெ.க. மாநாட்டிற்கு நிலம் கொடுத்த விவசாயிகளுக்கு விருந்தளித்தார் விஜய்!

கட்சி மாநாட்டிற்கு நிலம் கொடுத்த விவசாயிகளுக்கு த.வெக. தலைவர் விஜய் நன்றி தெரிவித்து விருந்தளித்தார்.

நடிகர் விஜய் தமிழக வெற்றிக் கழகம் என்ற அரசியல் கட்சியை தொடங்கியிருக்கிறார். இந்த கட்சியின் முதல் மாநாடு கடந்த மாதம் 27-ம் தேதி விழுப்புரம் மாவட்டம் விக்கிரவாண்டியில் நடைபெற்றது. இதில் லட்சக்கணக்கான தொண்டர்கள் பங்கேற்றனர். இந்த மாநாட்டிற்கு வி.சாலை பகுதியில் சுமார் 170 ஏக்கர் நிலம் ஒதுக்கப்பட்டு, மாநாடு பிரமாண்டமாக நடைபெற்றது. அதில் விவசாய நிலங்களும் அடங்கும்.

இந்த மாநாட்டில் விஜய்யின் பரபரப்பான பேச்சு தமிழக அரசியல் வட்டாரத்தில் பெரும் அதிர்வலையை ஏற்படுத்தியது.மாநாட்டை தொடர்ந்து 2026-ம் ஆண்டு சட்டமன்ற தேர்தலை எதிர்கொள்ள தமிழக வெற்றிக்கழகம் தயாராகி வருகிறது. அதற்கேற்ப அரசியல் வியூகங்களை விஜய் அமைத்து வருகிறார்.

இந்த நிலையில், விக்கிரவாண்டியில் த.வெக. மாநாட்டிற்கு நிலம் கொடுத்த விவசாயிகளுக்கு விஜய், இன்று விருந்து அளித்தார். இதற்கான ஏற்பாடுகள் பனையூரில் உள்ள த.வெ.க. கட்சி அலுவலகத்தில் விறுவிறுப்புடன் நடைபெற்று வந்தது. இந்த நிலையில் இன்று மதியம் 1 மணியளவில் அலுவலகத்திற்கு விஜய் வந்தடைந்தார். இதனை தொடர்ந்து நிலம் கொடுத்த விவசாயிகளுக்கு நன்றி தெரிவித்து விஜய் விருந்து அளித்தார். விஜய் விவசாயிகளுக்கு சைவ விருந்தளித்தார்