திருட்டு வழக்கில் கைதான 2பேருக்கு ஓராண்டு சிறை : சிவகிரி நீதிமன்றம் தீர்ப்பு

புளியங்குடி அருகே வாகனத்தை திருடிய வழக்கில் கைதான 2பேருக்கு  ஓராண்டு   சிறை தண்டனை விதித்து சிவகிரி நீதிமன்றம் தீர்ப்பு அளித்தது.

தென்காசி மாவட்டம் புளியங்குடி காவல் நிலைய எல்லைக்குட்பட்ட  புளியங்குடி பேருந்து நிலையத்தில் கடந்த 2013 ஆம் ஆண்டு நிறுத்தி வைத்திருந்த வாகனத்தை திருடிய வழக்கில்  சென்னை பழைய வண்ணாரப் பேட்டையை சேர்ந்த தங்க ரத்தினம் மகன் ராஜேஷ்(37) மற்றும் சென்னை கொருக்குப் பேட்டை அண்ணாதுரை மகன் திலிப் ராஜா (35) ஆகியோரை அப்போதைய காவல் ஆய்வாளர் கோவிந்தன் கைது செய்து சிறையில் அடைத்தார்.

இவ்வழக்கின் விசாரணையானது சிவகிரி குற்றவியல் நடுவர் நீதிமன்றத்தில் நடைபெற்று வந்தது.  வழக்கினை விசாரணை செய்த நீதிபதி காளீஸ்வரி  குற்றவாளிகள் இருவருக்கும்  தலா ஓராண்டு சிறை தண்டனை மற்றும் ரூ.1000  அபராதம்  விதித்து தீர்ப்பளித்தார்.   இவ்வழக்கில் திறம்பட விசாரணை செய்து, சாட்சிகளை விரைவாக ஆஜர்படுத்தி குற்றவாளிக்கு தண்டனை வாங்கி கொடுத்த புளியங்குடி காவல்துறையினருக்கு மாவட்ட காவல் கண்காணிப்பாளர் சுரேஷ் குமார்  தனது வாழ்த்துக்களை தெரிவித்தார்.