தூத்துக்குடி அருகே 7 அடி குழியில் விழுந்த சினைப் பசு மாடு மீட்பு

தூத்துக்குடி அருகே 7 அடி குழியில் விழுந்த சினைப் பசு மாட்டினை தீயணைப்பு வீரர்கள் பத்திரமாக மீட்டனர். 

தூத்துக்குடி மாவட்டம், புதுக்கோட்டை அருகேயுள்ள சிறுபாடு விஜிபி நகரில் புதியதாக வீடு கட்ட வானம் தோண்டிய குழியில் ஆனந்தன் என்பவரது சினைப் பசு மாடு கால் தவறி விழுந்து உயிருக்கு போராடிக் கொண்டிருந்தது. இதை அறிந்த பசு மாட்டின் உரிமையாளர் ஆனந்தன் சிப்காட் தீயணைப்பு மீட்புப் பணி நிலையத்தை தொடர்பு கொண்டு பசு மாட்டினை மீட்டுத் தருமாறு உதவி கோரினார்.

உடனடியாக சிப்காட் நிலைய அலுவலர் த.கார்த்திகேயன் தலைமையில், ஏட்டு இசக்கிராஜன், தவசி, ராம்குமார், முத்து ஜெயக்குமார் வெங்கிடசாமி ஆகிய தீயணைப்பு வீரர்கள் விரைந்து ஸ்தலம் வந்து 5 அடி நீள, அகலம், 7 அடி குழியில் விழுந்து கிடந்த சினைப் பசு மாட்டினை கயிறுகளால் கட்டி ஜேசிபி மூலம் பத்திரமாக மீட்டு உரிமையாளரிடம் ஒப்படைத்தனர். எவ்வித காயமுமின்றி சினைப் பசுமாட்டினை மீட்ட சிப்காட் தீயணைப்பு வீரர்களை அப் பகுதி மக்கள் வெகுவாக பாராட்டினர்.