கன்னியாகுமரி – தூத்துக்குடி பகல் நேர பயணிகள் ரயில் மீண்டும் இயக்கப்படுமா?

கன்னியாகுமரி – தூத்துக்குடி இடையே பகல் நேர ரயிலை மீண்டும் இயக்க வேண்டும் என்று தூத்துக்குடி, நெல்லை, குமரி மாவட்ட பயணிகள் ரயில்வே துறைக்கு கோரிக்கை விடுத்துள்ளனர். 

இது தொடர்பாக கன்னியாகுமரி மாவட்ட பயணிகள் நலச்சங்கம் வெளியிட்ட அறிக்கை: திருநெல்வேலியிருந்து செங்கோட்டை, புனலூர் கொல்லம் வழியாக பாலக்காடு பாலருவி எக்ஸ்பிரஸ் ரயில் தூத்துக்குடி வரை நீட்டிப்பு செய்யப்பட்டுள்ளது. இந்த ரயில் நீட்டிப்பு, திருநெல்வேலி, தென்காசி, கொல்லம் மாவட்டத்தில் உள்ள பயணிகள் துறைமுக நகரமாக தூத்துக்குடி நேரடி ரயில் சேவை கிடைத்துள்ளது.

ஆனால் கன்னியாகுமரி, திருவனந்தபுரம், திருநெல்வேலி மாவட்டத்தின் தென்பகுதி பகுதியில் உள்ள மக்களுக்கு தூத்துக்குடி நேரடியாக செல்ல வேண்டும் என்றால் தற்போது எந்த ஒரு ரயில் வசதியும் இல்லை. ஏதாவது ஒரு ரயிலில் திருநெல்வேலி சென்றுவிட்டு பின்னர் தூத்துக்குடி செல்லலாம் என்றாலும் கால அட்டவணை பொருந்தும் வகையில் எந்த ஒரு ரயில் சேவையும் இல்லை.

நிறுத்தப்பட்ட கன்னியாகுமரி – தூத்துக்குடி பயணிகள் ரயில்: தூத்துகுடியிலிருந்து திருநெல்வேலி வழியாக கன்னியாகுமரிக்கு பயணிகள் ரயில் 1999-ம் ஆண்டு இயக்கப்பட்டு வந்துள்ளது. கன்னியாகுமரியிலிருந்து கிழக்கு கடற்கரை சாலை வழியாக தூத்துக்குடி சென்றால் குறைந்த கால அளவில் பேருந்துகளில் சென்றுவிட முடியும். ஆனால் கன்னியாகுமரி – தூத்துக்குடி ரயில் நாகர்கோவில், வள்ளியூர், திருநெல்வேலி, வாஞ்சி மணியாச்சி வழியாக தூத்துக்குடி சுற்றுப்பாதையில் ஒருவழிப் பாதையில் சென்று வந்தது. இது மட்டுமல்லாமல் வாஞ்சி மணியாச்சி ரயில் நிலையத்தில் இந்த ரயிலுக்கு இஞ்சின் மாற்றுவது 15 முதல் 30 நிமிடங்கள் வரை எடுத்து கொண்டது. 

அந்த காலகட்டத்தில் போதிய பயணிகள் விழிப்புணர்வு இல்லாத காரணத்தால் போதிய பயணிகள் இன்றி காலியாக இயக்கப்பட்டது. இந்த காரணத்தால்  ரயில்வே துறையால் இந்த ரயில் நிறுத்தப்பட்டுவிட்டது. தற்போது நிலை முழுவதும் மாறிவிட்டது. நாகர்கோவில் டவுன் முதல் தூத்துக்குடி வரை உள்ள பாதை இருவழிப்பாதையாக மாற்றம் பெற்றுவிட்டது. இது மட்டுமல்லாமல் வாஞ்சி மணியாச்சியில் பைபஸ் லைன் பயணிகள் ரயில்கள் இயக்கத்திற்காக அனுமதிக்கப்பட்டுள்ளது. 

இதனால் இன்ஜின் மாற்றி இயக்க வேண்டிய பிரச்சனை இல்லை. எனவே இந்த தூத்துக்குடி ரயிலை மீண்டும் இயக்க வேண்டும் என்று இந்த மூன்று மாவட்ட பயணிகள் ரயில்வே துறைக்கு கோரிக்கை விடுத்துள்ளனர்.  இவ்வாறு இந்த ரயிலை இயக்கும் போது இந்த ரயில் திருவனந்தபுரம் மாவட்ட பயணிகள் வசதிக்காக கொச்சுவேலியிருந்து இயக்க வேண்டும். இவ்வாறு இயக்கும் போது திருவனந்தபுரத்தில் உள்ள விமான நிலையத்துடன் நேரடியாக தூத்துக்குடி ரயில் வசதி கிடைக்கும். இது மட்டும் இல்லாமல் கொச்சுவேலியிருந்து வடஇந்தியாவில் இயக்கப்பட்டு பல்வேறு ரயில்களில் இணைப்பு ரயிலாகவும் இருக்கும்.

நீட்டிப்பு: கொச்சுவேலியிருந்து காலையில் புறப்படும் படியாக நாகர்கோவிலுக்கு தற்போது பயணிகள் ரயில் இயக்கப்பட்டு வருகிறது. மறு மார்க்கமாகவும் மாலை நாகர்கோவிலிருந்து கொச்சுவேலிக்கு பயணிகள் ரயில் இயக்கப்பட்டு வருகிறது.  இந்த ரயிலை தூத்துக்குடி வரை நீட்டிப்பு செய்து கொச்சுவேலி – தூத்துக்குடி என்று இயக்க வேண்டும் என்று கன்னியாகுமரி மாவட்ட ரயில் பயணிகள் சங்கம் கோரிக்கை விடுக்கின்றது.

எக்ஸ்பிரஸ் கட்டணம் மாற்ற வாய்ப்பு: ரயில்வே துறை 200 கி.மீக்கு மேல் இயங்கும் பயணிகள் ரெயில்களை எக்ஸ்பிரஸ் கட்டணத்தில் இயக்கி வருகிறது. இதற்கு முன்பு செங்கோட்டை – மதுரை மற்றும் திண்டுக்கல் - மயிலாடுதுறை ஆகிய இரண்டு ரயில்களையும் இணைத்து ஒரே ரயிலாக இயக்கிய போது செங்கோட்டை – மதுரை மார்க்கத்தில் இயங்கிய ரயில் எக்ஸ்பிரஸ் கட்டண ரயிலாக மாற்றம் பெற்றது.

கொச்சுவேலியிருந்து தூத்துக்குடிக்கு இயக்கும் போது தூரம் இவ்வாறு வருகிறது.

திருநெல்வேலி – தூத்துக்குடி – 58.5 கி.மீ

திருநெல்வேலி – திருவனந்தபுரம் -142.8

மொத்த தூரம்  201.3 கி.மீ

திருநெல்வேலி – தூத்துக்குடி – 58.5 கி.மீ

திருநெல்வேலி – கொச்சுவேலி  -150 கி.மீ

மொத்த தூரம்  208.5 கி.மீ

இவ்வாறு இயங்கும் போது எக்ஸ்பிரஸ் கட்டண ரயிலாக மாற்றம் செய்ய அதிக வாய்ப்பு உள்ளது. இந்த நிலையில் இரண்டு ரயில்காளாக இயக்கலாம் என்று கன்னியாகுமரி மாவட்ட ரயில் பயணிகள் சங்கம் கோரிக்கை விடுத்துள்ளது. அதன்படி கொச்சுவேலி – திருநெல்வேலி பயணிகள் ரயில்  திருநெல்வேலி – தூத்துக்குடி  பயணிகள் ரயில் என்று இரண்டு ரயிலாக இயக்கலாம் என்ற ஆலோசனையும் ரயில்வே துறையிடம் வைக்கப்படுகின்றது.