தூத்துக்குடி மாவட்டத்தில் 156 பேர் குண்டர் தடுப்பு சட்டத்தில் சிறையிலடைப்பு

தூத்துக்குடி மாவட்டத்தில் இதுவரை 156 பேர் குண்டர் தடுப்பு சட்டத்தில் சிறையில் அடைக்கப்பட்டுள்ளனர். 

கடந்த 21.10.2023 அன்று தூத்துக்குடி  வடபாகம் காவல் நிலைய எல்லைக்குட்பட்ட தூத்துக்குடி புதிய பேருந்து நிலையம், உழவர் சந்தை அருகில் விற்பனைக்காக கஞ்சா வைத்திருந்த வழக்கில் தூத்துக்குடி ஆறுமுகநேரி, பாரதிநகரை சேர்ந்த பெருமாள் என்பவரது மகன்களான  செல்வராஜ் (எ) செல்லக்குட்டி (28) மற்றும் சின்னதம்பி (26) ஆகியோரை வடபாகம் காவல் நிலைய போலீசார் கைது செய்து, அவர்களிடமிருந்த கஞ்சாவையும் பறிமுதல் செய்தனர்.  மேற்படி இவ்வழக்கின் எதிரிகளான செல்வராஜ் (எ) செல்லக்குட்டி  மற்றும் சின்னதம்பி ஆகியோர் மீது குண்டர் தடுப்பு சட்டத்தில் நடவடிக்கை எடுக்க வடபாகம் காவல் நிலைய ஆய்வாளர் திரு. பிரேம் ஆனந்த் அவர்கள் தூத்துக்குடி மாவட்ட காவல் கண்காணிப்பாளர் அவர்களிடம் அறிக்கை தாக்கல் செய்தார்.

மேற்படி காவல் ஆய்வாளரின் அறிக்கையின் அடிப்படையில் மாவட்ட காவல் கண்காணிப்பாளர் டாக்டர் எல். பாலாஜி சரவணன் அவர்கள் தூத்துக்குடி மாவட்ட ஆட்சியர் அவர்களுக்கு பரிந்துரை செய்தார்.

அதன் பேரில் மாவட்ட ஆட்சியர் டாக்டர் திரு. கோ. லட்சுமிபதி இ.ஆ.ப அவர்கள் தூத்துக்குடி ஆறுமுகநேரி, பாரதிநகரை சேர்ந்த பெருமாள் என்பவரது மகன்களான  செல்வராஜ் (எ) செல்லக்குட்டி  மற்றும் சின்னதம்பி  ஆகிய 2 பேரையும் குண்டர் தடுப்புச் சட்டத்தில் கைது செய்ய உத்தரவிட்டார். அவரது உத்தரவின் பேரில் வடபாகம் காவல் நிலைய ஆய்வாளர் திரு. பிரேம் ஆனந்த் மேற்படி எதிரிகளை குண்டர் தடுப்பு சட்டத்தில் கைது செய்து பாளையங்கோட்டை மத்திய சிறையில் அடைத்தார்.

இந்த ஆண்டு இதுவரை போக்சோ வழக்குகளில் சம்மந்தப்பட்ட 13 எதிரிகள் மற்றும் போதை பொருட்கள் கடத்தல் மற்றும் விற்பனையில் ஈடுபட்ட 30 எதிரிகள் உட்பட 156 எதிரிகள் குண்டர் தடுப்பு சட்டத்தில் கைது செய்யப்பட்டு சிறையிலடைக்கப்பட்டுள்ளனர்.