மாடியில் இருந்து தவறி விழுந்து பார் உரிமையாளர் சாவு

கயத்தாறு அருகே வீட்டு மாடியிலிருந்து தவறி விழுந்து படுகாயம் அடைந்த பார் உரிமையாளர் சிகிச்சை பலனின்றி பரிதாபமாக உயிரிழந்தார்.

தூத்துக்குடி மாவட்டம், கயத்தாறு அருகே உள்ள சவலாபேரி கிராமம், கீழத் தெருவைச் சேர்ந்தவர் மருதுபாண்டியன் மகன் மாடசாமி (36). இவர் வடக்கு இலந்தைகுளம் கிராமத்தில் டாஸ்மாக் கடையில் பார் ஏலம் எடுத்து நடத்தி வந்தார். இந்நிலையில் மாடசாமி சம்பவத்தன்று வீட்டின் மொட்டை மாடியில் இருந்து கீழே இறங்கி வந்தவர், திடீரென்று நிலைதடுமாறி விழுந்து படுகாயம் அடைந்துள்ளார். 

அவரை குடும்பத்தினர் மீட்டு கோவில்பட்டி அரசு மருத்துவமனையில் சேர்த்தனர். அங்கு முதலுதவி சிகிச்சைக்கு பின்னர் மதுரையிலுள்ள ஒரு தனியார் மருத்துவமனையில் சிகிச்சை பெற்று வந்தார். இந்த நிலையில் நேற்று சிகிச்சை பலனின்றி இறந்தார். இதுகுறித்து கயத்தாறு இன்ஸ்பெக்டர் (பொ) விஜயகுமார் வழக்குப்பதிவு செய்து விசாரணை நடத்தி வருகிறார். இறந்துபோன மாடசாமிக்கு லெட்சுமி(30) என்ற மனைவியும், பிரதீப்(6) என்ற மகனும் உள்ளனர்.