இலங்கைக்கு கடத்த முயற்சி: ரூ.20 லட்சம் பீடி இலைகள் தூத்துக்குடியில் பறிமுதல்!

தூத்துக்குடியில் இருந்து இலங்கைக்கு கடத்த முயன்ற ரூ.20 லட்சம் மதிப்புள்ள பீடி இலைகளை கடலோர பாதுகாப்பு குழும போலீசார் பறிமுதல் செய்தனர். 

தூத்துக்குடி கடலோர பாதுகாப்பு குழும காவல் துணை கண்காணிப்பாளர் பிரதாபன், காவல் ஆய்வாளர் சைரஸ் ஆகியோரின் உத்தரவின் பேரில்  உதவி ஆய்வாளர் ராதாகிருஷ்ணன் தலைமையில் நுண்ணறிவு பிரிவு தலைமை காவலர் முருகேசன், முதல் நிலை காவலர்கள், சுடலைமணி, சதன் ஸ்டார், பகவதி பாபு ஆகியோர் இன்று அதிகாலை வெள்ளப்பட்டி கடற்கரையில் ரோந்து பணியில் ஈடுபட்டனர். அப்போது கடற்கரையில் ஒரு படகு நின்று கொண்டிருந்தது. 

போலீசாரைக் கண்டதும் படகில் இருந்த சிலர், படகில் இருந்த மூட்டைகளை கடலுக்குள் வீசிவிட்டு கண்டதும் தப்பிச் சென்று விட்டதாக கூறப்படுகிறது. இதையடுத்து போலீசார் அந்த பண்டல்களை சோதனையிட்டபோது, அதில் சுமார் 2500 கிலோ எடை கொண்ட பீடி இலைகள் இருப்பது தெரியவந்தது. இதையடுத்து போலீசார் அவற்றை பறிமுதல் செய்தனர். இதன் சர்வதேச மதிப்பு ரூ.20 லட்சம் என்று கூறப்படுகிறது. இந்த பீடி இலைகள் இலங்கைக்கு கடத்த முயன்றது தெரியவந்துள்ளது. இது தொடர்பாக போலீசார் விசாரணை நடத்தி வருகின்றனர்.