ஜவுளிக்கடை அதிபரின் மனைவியிடம் 7 பவுன் நகை பறிப்பு: தூத்துக்குடியில் பரபரப்பு!

தூத்துக்குடியில் ஸ்கூட்டரில் சென்ற ஜவுளிக்கடை அதிபரின் மனைவியிடம் 7 பவுன் நகையை பறித்துச் சென்ற மர்மநபர்களை போலீசார் தேடி வருகின்றனர். 

தூத்துக்குடி ஸ்டேட் பாங்க் காலனியை சேர்ந்தவர் போஸ்கோ. இவரது மனைவி சாயசித்ரா (52). இவர்கள் தூத்துக்குடியில் ரெடிமேட் ஜவுளிக் கடை நடத்தி வருகின்றனர். நேற்று இரவு கடையை அடைத்து விட்டு சாயசித்ரா தனது மகளுடன் மொபட்டில் வீட்டுக்கு சென்று கொண்டிருந்தார். அவர்கள் புதிய பஸ் நிலையம் கடந்து சென்ற போது பின்னால் பைக்கில் வந்த 2  பேர், திடீரென சாயசித்ரா கழுத்தில் கிடந்த 7 பவுன் செயினை பறித்துவிட்டு கண்ணிமைக்கும் நேரத்தில்  தப்பி சென்றனர். 

இதனால் நிலை தடுமாறிய தாய்-மகள் இருவரும் மொபட்டில் இருந்து கீழே விழுந்தனர். இதில் காயமடைந்த 2 பேரும் தூத்துக்குடி அரசு மருத்துவமனையில் சேர்க்கப்பட்டு சிகிச்சை பெற்றனர். இது தொடர்பான புகாரின் பேரில் வடபாகம் போலீசார் வழக்குப்பதிவு செய்து விசாரணை நடத்தி வருகின்றனர். மேலும் அப்பகுதியில் உள்ள சி.சி.டி.வி. காமிராக்களில் பதிவான காட்சிகளை ஆய்வு செய்து கொள்ளையில் ஈடுபட்ட மர்மநபர்களை அடையாளம் காணும் பணியில் ஈடுபட்டுள்ளனர்.