ஜடேஜா அதிரடி: சென்னை சூப்பர் கிங்ஸ் அணி த்ரில் வெற்றி!

வருண் சக்ரவர்த்தி வீசிய 18-வது ஓவரின் முதல் பந்தில் இரண்டாவது ரன் எடுக்க முயற்சித்து ரெய்னாவும் ஆட்டமிழக்க அதே ஓவரில் கேப்டன் தோனியும் 1 ரன்னுக்கு ஆட்டமிழந்ததால், ஆட்டம் மேலும் விறுவிறுப்பானது. அந்த ஓவரில் 5 ரன்கள் மட்டுமே கிடைத்ததால், சென்னை வெற்றிக்கு கடைசி 2 ஓவர்களில் 26 ரன்கள் தேவைப்பட்டன. பிரசித் கிருஷ்ணா 19-வது ஓவரை வீச முதல் இரண்டு பந்துகளில் ரவீந்திர ஜடேஜா மற்றும் சாம் கரனால் தலா 1 ரன் மட்டுமே எடுக்க முடிந்தது. 

ஆனால், அடுத்த 4 பந்துகளில் முறையே இரண்டு சிக்ஸர்கள், 2 பவுண்டரிகள் விளாசி ஆட்டத்தை முற்றிலும் சென்னை பக்கம் திருப்பினார். இதனால், சென்னை வெற்றிக்குக் கடைசி ஓவரில் 4 ரன்கள் மட்டுமே தேவைப்பட்டன. கடைசி ஓவரை சுனில் நரைன் வீசினார். முதல் பந்திலேயே சாம் கரன் ஆட்டமிழக்க மீண்டும் பதற்றம் அதிகரித்தது. அடுத்த பந்தில் ஷர்துல் தாக்குர் ரன் எடுக்காததால் 4 பந்துகளில் 4 ரன்கள் தேவைப்பட்டன. ஆனால், அடுத்த பந்தில் சாமர்த்தியமான ஷாட்டால் சென்னைக்கு 3 ரன்கள் கிடைத்தன. 

3 பந்துகளில் 1 ரன்கள் தேவை. ஜடேஜா களத்தில் இருந்தார். 4-வது பந்தில் ரன் இல்லை. 5-வது பந்தில் ஜடேஜாவுக்கு எல்பிடபிள்யு கொடுத்தார் நடுவர். ஜடேஜா ரிவியு எடுக்க மூன்றாவது நடுவரால் விக்கெட் என்பது உறுதி செய்யப்பட்டது. ஜடேஜா 8 பந்துகளில் 22 ரன்கள் எடுத்தார். இதனால், கடைசி பந்தில் சென்னை வெற்றிக்கு 1 ரன் தேவைப்பட்டது. தீபக் சஹார் தூக்கி அடித்து 1 ரன் எடுக்க சென்னை அணி கடைசி பந்தில் த்ரில் வெற்றி பெற்றது.