பகவதி அம்மன் கோவில் வைகாசி விசாக திருவிழா தேரோட்டம்: குமரியில் கோலாகலம்!!

கன்னியாகுமரி பகவதி அம்மன் கோவிலில் வைகாசி விசாக பெருந்திருவிழா தேரோட்டம் கோலாகலமாக நடைபெற்றது. 

பிரசித்தி பெற்ற கன்னியாகுமரி பகவதி அம்மன் கோவிலில் வைகாசி விசாக பெருந்திருவிழா கடந்த 24-ந்தேதி கொடியேற்றத்துடன் தொடங்கியது. விழா நாட்களில் தினமும் சிறப்பு அபிஷேகம், அம்மன் வாகனத்தில் பவனி வருதல் ஆகியவை நடைபெற்றது. விழாவின் 9-ம் திருவிழாவான இன்று (வியாழக்கிழமை) காலை தேரோட்டம் நடைபெற்றது. இதில் அமைச்சர் மனோ தங்கராஜ் கலந்து கொண்டு தேரோட்டத்த துவக்கி வைத்தார். விழாவில் திரளான பக்தர்கள் கலந்து கொண்டனர். 

கன்னியாகுமரி பகவதி அம்மன் கோவில் தேரோட்ட நிகழ்ச்சியை முன்னிட்டு டிஎஸ்பி ராஜா தலைமையில் ஏராளமான போலீசார் பாதுகாப்பு பணியில் ஈடுபட்டனர். மேலும், கன்னியாகுமரி சிறப்பு நிலை பேரூராட்சி நிர்வாகம் சார்பில் பக்தர்களுக்கு அடிப்படை வசதிகளும் செய்யப்பட்டுள்ளது. தேரோட்டத்தை முன்னிட்டு நாகர்கோவில் இருந்து கன்னியாகுமரிக்கு அரசு சார்பில் சிறப்பு பஸ்களும் இயக்க ஏற்பாடுகள் செய்யப்பட்டுள்ளது.

தேரோட்டத்தையொட்டி விவேகானந்தர் நினைவு மண்டபம் மற்றும் விவேகானந்தா கேந்திரா தொழிலாளர்கள் குடும்பத்துடன் பங்கேற்க வசதியாகவும், சுற்றுலா பயணிகளும் இதில் கலந்துகொண்டு சாமி தரிசனம் செய்ய வசதியாகவும் விவேகானந்தர் மண்டபம், திருவள்ளுவர் சிலைக்கு படகு போக்குவரத்து 2 மணிநேரம் ரத்து செய்யப்பட்டுள்ளது. அதன்படி காலை 8 மணிக்கு தொடங்க வேண்டிய படகு போக்குவரத்து 2 மணி நேரம் தாமதமாக காலை 10 மணிக்கு தொடங்கியது.