நெல்லை, தென்காசி உட்பட 9 மாவட்டங்களில் உள்ளாட்சி தேர்தல் தேதி அறிவிப்பு

தமிழகத்தில் நெல்லை, தென்காசி உட்பட 9 மாவட்டங்களில் ஊரக உள்ளாட்சி தேர்தல் 2 கட்டங்களாக நடைபெறும் என்று தமிழக தேர்தல் ஆணையர் பழனிகுமார் அறிவித்தார்.

உள்ளாட்சி தேர்தல் அறிவிப்பு தொடர்பாக சென்னையில் செய்தியாளர்களை சந்தித்த தமிழக தேர்தல் ஆணையர் பழனிகுமார்  கூறியதாவது, விடுபட்ட 9 மாவட்டங்களில் 2 கட்டமாக அக்டோபர் 6 மற்றும் 9 ஆகிய தேதிகளில் ஊரக உள்ளாட்சித் தேர்தல் நடைபெறும். இதில் முதல் கட்ட வாக்குப்பதிவு அக்டோபர் 6-ம் தேதியும், இரண்டாம் கட்ட வாக்குப்பதிவு 9-ம் தேதியும் நடைபெறவுள்ளது.

செங்கல்பட்டு, காஞ்சிபுரம், விழுப்புரம், கள்ளக்குறிச்சி, நெல்லை, தென்காசி, வேலூர், திருப்பத்தூர், ராணிப்பேட்டை மாவட்டங்களில் உள்ளாட்சித் தேர்தல் நடைபெறுகிறது. நாளை மறுநாள் முதல் உள்ளாட்சி தேர்தலுக்கான வேட்புமனு தொடங்கும். செப்டம்பர் 23-ம் தேதி வேட்புமனுக்கள் மீதான பரிசீலனை நடைபெறும். செப்டம்பர் 25-ம் தேதி வேட்புமனுக்களை திரும்பப்பெறலாம். காலை 7 மணி முதல் மாலை 6 மணி வரை வாக்காளர்கள் வாக்களிக்கலாம். கரோனாவால் பாதிக்கப்பட்டவர்கள் மாலை 5 மணி முதல் மாலை 6 மணி வரை வாக்களிக்கலாம் என்று கூறினார்..