நெல்லை அருகே நர்ஸ் வெட்டிக்கொலை; குடும்ப தகராறில் மருமகன் வெறிச்செயல்

மூலைக்கரைப்பட்டியில் குடும்ப தகராறில் அரசு மருத்துவமனை நர்ஸை அரிவாளால் வெட்டிக்கொலை செய்த மருமகனை போலீசார் கைது செய்தனர்.

நெல்லை மாவட்டம் மூலைக்கரைப்பட்டி அம்பேத்கர் தெருவைச் சேர்ந்தவர் ராஜலட்சுமி (50). இவர் பாளையங்கோட்டை ஐகிரவுண்டு அரசு மருத்துவமனையில் மருத்துவ பணியாளராக வேலை செய்து வந்தார். இவருடைய கணவர், வெளிநாட்டில் வேலை செய்து வருகிறார். இவர்களுக்கு ஒரு மகன், ஒரு மகள் உள்ளனர். மகளுக்கு திருமணமாகி, மூலைக்கரைப்பட்டி கல்லத்தியில் கணவர் அபிமன்யுவுடன் வசித்து வருகிறார்.

இந்நிலையில் ராஜலட்சுமிக்கும், அவருடைய மருமகன் அபிமன்யுவுக்கும் இடையே குடும்ப பிரச்சினை தொடர்பாக முன்விரோதம் இருந்தது. நேற்று இரவில் அபிமன்யு தனது மாமியாரின் வீட்டுக்கு சென்று மீண்டும் தகராறு செய்தார். அப்போது ஆத்திரம் அடைந்த அபிமன்யு, ராஜலட்சுமியை அரிவாளால் சரமாரியாக வெட்டிக் கொலை செய்தார். இதுகுறித்து மூலைக்கரைப்பட்டி போலீசார் வழக்குப் பதிந்து, அபிமன்யுவை கைது செய்தனர். மூலைக்கரைப்பட்டியில் குடும்ப தகராறில் மாமியாரை மருமகன் வெட்டிக்கொலை செய்த சம்பவம் பெரும் பரபரப்பை ஏற்படுத்தியது.