நடிகர் ரஜினிகாந்த்துடன் கேரள மாற்றுத் திறனாளி இளைஞர் பிரணவ் சந்திப்பு

கேரள முதல்வருடன் செல்ஃபி எடுத்துக் கொண்ட மாற்றுத் திறனாளி இளைஞர் பிரணவ், நடிகர் ரஜினிகாந்தை சந்தித்துள்ளார்.

கேரளா மாநிலம் ஆலத்தூரைச் சேர்ந்த மாற்றுத்திறனாளி ஓவியரான பிரணவ், மகா புயலால் கேரளா பாதிக்கப்பட்ட போது, தன்னால் இயன்ற நிவாரண நிதியை அளிப்பதற்காக அம்மாநில முதல்வர் பினராயி விஜயனை சந்தித்தார்.பிரணவிடம் நிவாரண நிதியை பெற்றுக்கொண்ட பினராயி விஜயன், தனது கைகளால் அவரது கால்களை குலுக்கி பாராட்டினார். தொடர்ந்து பிரணவுடன் செல்ஃபி எடுத்துக் கொண்ட பினராயி, அதனை தனது ட்விட்டர் பக்கத்தில் வெளியிட்டு, பிரணவ் உடனான சந்திப்பு நெகிழ்சியாக இருந்தது என பதிவிட்டிருந்தார். 

கைகள் இல்லாமல் கால்களை மட்டுமே பயன்படுத்தும் பிரணவ், கால்கள் மூலம் படங்கள் வரைவது உள்ளிட்ட பல்வேறு சாதனைகளை நிகழ்த்தியுள்ளார். கேரள முதல்வருடனான சந்திப்பு பற்றி பேசியிருந்த பிரணவ், நடிகர் ரஜினிகாந்தை சந்திப்பது குறித்த தனது ஆசையையும் வெளிப்படுத்தியிருந்தார்.இந்நிலையில், மாற்றுத் திறனாளி இளைஞர் பிரணவ், நடிகர் ரஜினிகாந்தை போயஸ் இல்லத்தில் சந்தித்துள்ளார். அப்போது, தான் வரைந்த ஓவியத்தை ரஜினிக்கு பரிசளித்த பிரணவ், ரஜினிகாந்துடன் செல்ஃபி எடுத்துக் கொண்டார். தற்போது அந்த புகைப்படங்கள் வைரலாகி வருகிறது.