வெளிநாட்டில் வேலை வாங்கித் தருவதாக ரூ.12 லட்சம் மோசடி: போலீசார் விசாரணை

திருச்செந்தூர் அமலிநகரைச் சேர்ந்தவர் அருணா (45). இவர் தனது மகன் பிளஸ்டனை வெளிநாட்டில் வேலைக்கு அனுப்புவதற்காக முயற்சி செய்து வந்தாராம். இந்நிலையில் திருச்சி மாவட்டம் திருவானைக்கோவிலைச் சேர்ந்த பிரான்சிஸ் மகன் ஜெயந்தன் என்பவர், துபையில் வேலை வாங்கி தருவதாக அருணாவிடம் கூறினாராம்.

இதைத் தொடர்ந்து பிளஸ்டன் மற்றும் அவரது நண்பர்கள் லிஜோ, டேனிவாஸ், ஆகாஷ் ராஜன் ஆகியோரை துபையில் வேலைக்கு சேர்க்க முயற்சி செய்து உள்ளனர். இதற்காக ஜெயந்தன் 4 பேரிடமிருந்து மொத்தம் ரூ.12 லட்சம் பெற்றுக் கொண்டாராம்.

அதன்பிறகு பிளஸ்டன், லிஜோ ஆகிய 2 பேரையும் சுற்றுலா விசாவில் துபைக்கு அனுப்பி உள்ளார். ஆனால் எந்த வேலையும் வாங்கி கொடுக்கவில்லையாம். மற்ற இருவரையும் துபைக்கு அனுப்பவில்லையாம். இதனால் தாங்கள் ஏமாற்றப்பட்டதை அறிந்த அருணா, இது குறித்து தூத்துக்குடி மாவட்ட காவல் கண்காணிப்பாளர் ஆல்பர்ட் ஜானிடம் புகார் அளித்தார். அதன்பேரில் மாவட்ட குற்றப்பிரிவு போலீசார் ஜெயந்தன் மீது மோசடி வழக்கு பதிவு செய்து விசாரணை மேற்கொண்டு வருகின்றனர்.

மற்றொரு சம்பவம்: தூத்துக்குடியில் உள்ள ஒரு பெண் உள்பட 3 பேரிடம் துபையில் கப்பலில் வேலைக்கு சேர்த்து விடுவதாக சிவகங்கை மாவட்டம் சீராவயலைச் சேர்ந்த வினோத், தூத்துக்குடியைச் சேர்ந்த ராபின் ஆகியோர் கூறி உள்ளனர். இதற்காக 3 பேரிடமும் மொத்தம் ரூ.9 லட்சத்து 10 ஆயிரம் பணம் வாங்கினராம்.

பின்னர் அவர்களை மும்பை வரை அழைத்து சென்றுவிட்டு, துபைக்கு அனுப்பி வைக்கவில்லை எனக் கூறப்படுகிறது. இது குறித்து பாதிக்கப்பட்டவர்கள் மாவட்ட காவல் கண்காணிப்பாளர்ஆல்பர்ட் ஜானிடம் புகார் அளித்தனர். அதன்பேரில் மாவட்ட குற்றப்பிரிவு போலீசார், றியதாக வினோத், ராபின் ஆகியோர் மீது மோசடி வழக்கு பதிவு செய்து விசாரித்து வருகின்றனர்.