விஏஓ அலுவலகம் முன் விலைப்பட்டியல் போஸ்டர் : சமூக வலைதளங்களில் வைரல்!

தூத்துக்குடி மாவட்டம், சாத்தான்குளம் ஒன்றியம் கொம்பன் குளத்தில் ஊராட்சி மன்ற அலுவலகம், ரேஷன் கடை கிராம நிர்வாக அலுவலகம் ஒரே வளாகத்தில் செயல்பட்டு வருகிறது. கிராம நிர்வாக அலுவலராக பிரபா கனி என்பவர் பணிபுரிந்து வருகிறார். 

இந்நிலையில் நேற்று காலை கிராம நிர்வாக அலுவலராக சுவரில் கொம்பன்குளம் கிராம நிர்வாக அலுவலகம் விலைப்பட்டியல் என சாதி சான்றிதழ் வருமான சான்றிதழ் இருப்பிட சான்றிதழ் 200 ரூபாய் எனவும் இறப்பு, பட்டா சிட்டா என சான்றிதழ் வாங்குவதற்கு ரூபாய் நிர்ணயம் செய்து போடப்பட்டும் கிராம நிர்வாக அலுவலர் பெயர் பதிவு போட்டு அவர் போன் நம்பரை போட்டு ஜிபே பணம் செலுத்தலாம் என சுவரொட்டி குறிப்பிடப்பட்டுள்ளது. 

இதனை பார்த்த பொதுமக்கள் கிராம நிர்வாக அலுவலருக்கு தகவல் தெரிவித்தனர். மேலும் இந்த சுவரொட்டி ஒட்டப்பட்டது சமூக வலைத்தளங்களிலும் பரவியது. தகவல் அறிந்த வருவாய்த் துறையினர் ஒட்டப்பட்ட சுவரொட்டி உடனடியாக அப்புறப்படுத்தினர். 

இதுகுறித்து கிராம நிர்வாக அலுவலர் பிரபா கனியிடம் கேட்டபோது யாரோ மர்ம நபர்கள் வேண்டுமென்றே எங்களை கலங்கப்படுத்தும் நோக்கில் சுவரொட்டி ஒட்டி சென்றுள்ளனர். இது குறித்து சாத்தான்குளம் காவல் நிலையத்தில் புகார் அளித்துள்ளோம் என்றார். இதுகுறித்து சாத்தான்குளம் போலீசார் விசாரித்து வருகின்றனர்.