தந்தை திட்டியதால் வீட்டை விட்டு வெளியேறிய சிறுவன் மீட்பு : காவல்துறைக்கு பொதுமக்கள் பாராட்டு!

மெஞ்ஞானபுரத்தில் தந்தை திட்டியதால் வீட்டை விட்டு வெளியேறிய சிறுவனை பத்திரமாக மீட்டு உறவினரிடம் ஒப்படைத்த காவல்துறையினருக்கு பொதுமக்கள் பாராட்டு தெரிவித்தனர். 

திருநெல்வேலி குழந்தைகள் கடத்தல் தடுப்பு பிரிவு இன்ஸ்பெக்டர்  உமா மகேஸ்வரி நேற்று இரவு ரோந்து பணியில் ஈடுபட்ட போது பாளையங்கோட்டை பகுதியில் சந்தேகத்திற்கிடமாக தனியாக சுற்றித்திரிந்த 16 வயது மதிக்கத்தக்க சிறுவனை பிடித்து விசாரணை செய்தனர். அதில் அந்த சிறுவன் தூத்துக்குடி மாவட்டம், மெஞ்ஞானபுரம் பகுதியைச் சேர்ந்தவன் என்பதும் 11வது வகுப்பு படிக்கும் மாணவன் என்பதும், அவனது தந்தை திட்டியதால் கோபப்பட்டு வீட்டை விட்டு வெளியேறியதும் தெரியவந்தது.

இதனையடுத்து உடனடியாக மெஞ்ஞானபுரம் காவல் நிலைய சிஐடி போலீஸ் அந்தோணிகுமாரருக்கு தகவல் தெரிவிக்கப்பட்டது.  பின்னர் உடனடியாக சிஐடி போலீஸ் அந்தோணிகுமார் மற்றும் மெஞ்ஞானபுரம் காவல் நிலைய சார்பு ஆய்வாளர்  கணேசன் ஆகியோர் விரைந்து செயல்பட்டு சிறுவனை மீட்டு உறவினரிடம் பத்திரமாக ஒப்படைத்தனர். வீட்டை விட்டுவிட்டு வெளியேறிய சிறுவனை பத்திரமாக மீட்டு எவ்வித அசம்பாவிதம் ஏற்படாமல் தடுத்து துரிதமாக செயல்பட்டு அவனது உறவினரிடம் ஒப்படைக்க உதவிய திருநெல்வேலி இன்ஸ்பெக்டர்  உமா மகேஸ்வரி, சார்பு ஆய்வாளர்  கணேசன் மற்றும் சிஐடி போலீஸ்  அந்தோணிகுமார் ஆகியோரை அப்பகுதி மக்கள் வெகுவாக பாராட்டினர்.