» செய்திகள் - விளையாட்டு » மாவட்ட செய்தி (தூத்துக்குடி)
மாணவன் திடீர் மரணம்: போலீஸ் விசாரணை!
சனி 9, டிசம்பர் 2023 11:39:34 AM (IST)
கோவில்பட்டி அருகே 10ஆம் வகுப்பு மாணவன் திடீரென மயங்கி விழுந்து உயிரிழந்த சம்பவம் குறித்து போலீசார் விசாரணை நடத்தி வருகின்றனர்.
தூத்துக்குடி மாவட்டம் கோவில்பட்டி, முடுக்கலான்குளம் பகுதியைச் சேர்ந்தவர் பிரவீன் குமார். இவரது மகன் நிதிஷ்குமார் (15), குருமலையில் உள்ள ஒரு தனியார் பள்ளியில் பத்தாம் வகுப்பு படித்து வருகிறார். அங்குள்ள விடுதியில் தங்கி படித்து வருகிறார். இந்நிலையில், கடந்த 30ஆம் தேதி அவருக்கு உடல் நலக்குறைவு ஏற்பட்டதால் வீட்டிற்கு வந்துள்ளார்.
இந்நிலையில் நேற்று அவரது தாயார் மந்திதோப்பில் உள்ள கோவிலுக்கு மகனை அழைத்துச் சென்று விபூதி போட்டுள்ளார். பின்னர் சிறிது நேரத்தில் மாணவன் மயங்கி விழுந்துள்ளார். உடனடியாக அவரை கோவில்பட்டி அரசு மருத்துவமனைக்கு அழைத்துச் செல்லும் வழியில் பரிதாபமாக இறந்தார். இந்த சம்பவம் குறித்து கோவில்பட்டி மேற்கு காவல் நிலைய இன்ஸ்பெக்டர் கிங்ஸ்லி தேவானந்த் வழக்குப்பதிந்து விசாரணை நடத்தி வருகிறார்.