அதிக ஒலி எழுப்பும் சைலன்சர் பொருத்தினால் நடவடிக்கை: போக்குவரத்து அலுவலர் எச்சரிக்கை

போக்குவரத்து விதிகளை மீறி வாகனங்களில் அதிக ஒலி எழுப்பும் சைலன்சர்களை பொருத்தி பயன்படுத்தினால் நடவடிக்கை எடுக்கப்படும் என அறிவிக்கப்பட்டுள்ளது. 

இது தொடர்பாக தூத்துக்குடி வட்டார போக்குவரத்து அலுவலர் வெளியிட்ட செய்திக்குறிப்பில், "துணைப்போக்குவரத்து ஆணையர், திருநெல்வேலி உத்தரவின்படி, தூத்துக்குடி பகுதிகளில் இயங்கும் இருசக்கர வாகனங்களில் அதிக ஒலி எழுப்பும் சைலன்சர்கள், அதிக ஒலி எழுப்பும் பலகுரல் ஒலிப்பான்கள், மாற்றி அமைக்கப்பட்ட கேன்டில்பார்கள் மற்றும் தலைகவசங்களில் கேமரா பொருத்தி இயக்க கூடாது என அறிவுறுத்தப்படுகிறது. தவறும் பட்சத்தில் அபராதமாக ரூ. 10000 வசூலிக்கப்படும் என தெரிவித்துக்கொள்ளப்படுகிறது.

மேலும், இலகுரக நான்கு சக்கர வாகனங்களில் ஒட்டுநர் மற்றும் முன் இருக்கை, பின் இருக்கையிலிருந்து பயணிப்பவர்களும் கட்டயமாக சீட்பெல்ட் அணிய வேண்டும்; என தெரிவித்துக்கொள்ளப்படுகிறது. தவறும் பட்சத்தில் அபராதம் வசூலிக்கப்படும். இது குறித்து இனிவருங்காலங்களில் தொடர்ந்து கண்காணிக்கப்படும்" என தெரிவித்துக் கொள்ளப்படுகிறது.