திருச்செந்தூர் கோவில் வளாகத்தில் ரூ.29 லட்சத்தில் பொது சுகாதார வளாகம்: அமைச்சர் திறந்து வைத்தார்

திருச்செந்தூர் கோவில் வளாகத்தில் ரூ.29.41 லட்சத்தில் பொது சுகாதார வளாகத்தை அமைச்சர் அனிதா ராதாகிருஷ்ணன் திறந்து வைத்தார்.

திருச்செந்தூர் சுப்பிரமணிய சுவாமி கோவில் வளாகத்தில் பக்தர்களின் வசதிக்காக, மாவட்ட ஊரக வளர்ச்சி முகமை வைப்பு நிதியில் இருந்து ரூ.29.41 லட்சம் மதிப்பில் பொது சுகாதார வளாகம் புதுப்பிக்கப்பட்டது. மேலும் ரூ.14.72 லட்சம் மதிப்பில் நாழிக்கிணறு முதல் மூவர் சமாதி வரை நடைபாதையில் புதிதாக மின் விளக்குகள் அமைக்கப்பட்டுள்ளது. இதன் திறப்பு விழா நேற்று நடந்தது. இதில் தமிழக மீன்வளம், மீனவர் நலன் மற்றும் கால்நடை பராமரிப்புத்துறை அமைச்சர் அனிதா ராதாகிருஷ்ணன் கலந்துகொண்டு பொது சுகாதார வளாகத்தை ரிப்பன் வெட்டி திறந்து வைத்தார்.

நிகழ்ச்சியில், மாவட்ட ஆட்சியர் செந்தில்ராஜ், திருச்செந்தூர் கோட்டாட்சியர் புகாரி, தாசில்தார் சுவாமிநாதன், கோவில் இணை ஆணையர் கார்த்திக், தக்கார் பிரதிநிதியும் ஓய்வு பெற்ற கால்நடைத்துறை உதவி இயக்குனருமான பாலசுப்பிரமணிய ஆதித்தன், விடுதி மேலாளர் சிவநாதன், ஊரக வளர்ச்சித்துறை உதவி திட்ட அலுவலர் லீமாரோஸ், திருச்செந்தூர் நகராட்சி தலைவர் சிவஆனந்தி, துணை தலைவர் ஏ.பி.ரமேஷ், திருச்செந்தூர் யூனியன் ஆணையாளர் பொங்கலரசி, வட்டார வளர்ச்சி அலுவலர் முத்து கிருஷ்ணராஜா உள்பட பலர் கலந்து கொண்டனர்.

சென்னை அப்பல்லோ மருத்துவமனையின் ஒரு பிரிவான கேன்சர் சென்டர் மற்றும் தூத்துக்குடி மாவட்ட மருத்துவத்துறை இணைந்து நடமாடும் சுகாதார செயல் திட்டத்தின் கீழ் ஆறுமுகநேரி அன்னை எஸ்.பி.மஹால் திருமண மண்டபத்தில் பெண்களுக்கான மருத்துவ பரிசோதனை, புற்றுநோய் சிகிச்சை மற்றும் பரிசோதனை முகாம், மற்றும் நடமாடும் சுகாதார செயல் திட்டத்தின் கீழ் மருத்துவ பரிசோதனை முகாம் நடத்தியது. முகாமிற்கு மாவட்ட கலெக்டர் செந்தில்ராஜ் தலைமை தாங்கினார். தூத்துக்குடி மாவட்ட சுகாதாரத்துறை துணை இயக்குனர் பொற்செல்வம் வரவேற்றார்.

அமைச்சர் அனிதா ராதாகிருஷ்ணன் சிறப்பு விருந்தினராக கலந்து கொண்டு முகாமினை தொடங்கி வைத்து பேசினார். மேலும் நடமாடும் செயல்திட்டத்தின் கீழ் உள்ள நவீன வசதிகள் கொண்ட வாகனத்தில் அளிக்கப்படும் சிகிச்சைகளை அமைச்சர் கொடியசைத்து தொடங்கி வைத்தார். பின்னர் அந்த வாகனத்தில் உள்ள மருத்துவ வசதிகளையும் அவர் பார்வையிட்டார். அப்பல்லோ மருத்துவமனை டாக்டர் பேபியோ, மகிபன், சுஜி, காயாமொழி அரசு ஆரம்ப சுகாதார நிலைய மருத்துவர் மெர்சினோ உள்பட பலர் கலந்து கொண்டனர்.