மாற்றுத்திறனாளிகளின் தாய்மார்கள் இலவச தையல் இயந்திரம் பெற விண்ணப்பிக்கலாம்: ஆட்சியர் தகவல்

தூத்துக்குடி மாவட்டத்தில் மாற்றுத்திறனாளிகளின் தாய்மார்கள் இலவச தையல் இயந்திரம் வழங்கும் திட்டத்தில் விண்ணப்பித்து பயன்பெறலாம் என அறிவிக்கப்பட்டுள்ளது.

இது தொடர்பாக மாவட்ட ஆட்சியர் டாக்டர் கி.செந்தில் ராஜ் வெளியிட்ட செய்திக்குறிப்பில், தூத்துக்குடி மாவட்டத்தில் மாற்றுத்திறனாளிகள் நலத்துறை வழியாக பல்வேறு நலத்திட்ட உதவிகள் வழங்கப்பட்டு வருகிறது. அவர்களின் பொருளாதாரம் மேம்பாடு அடையும் பொருட்டு மோட்டார் பொருத்தப்பட்ட இலவச தையல் இயந்திரம் கை, கால் பாதிக்கப்பட்ட மாற்றுத்திறனாளிகளுக்கும் செவித்திறன் குறைபாடுடைய மாற்றுத்திறனாளிகள் மற்றும் மனவளர்ச்சி குன்றிய மாற்றுத்திறனாளிகளின் தாய்மார்களுக்கும் வழங்கப்படுகிறது. 

விருப்பமுள்ள 18 வயதிற்கு மேல் 45 வயதிற்குட்பட்ட மாற்றுத்திறனாளிகள், மாற்றுத்திறனாளிகளுக்கான தேசிய அடையாள அட்டை நகல், ஆதார் அட்டை நகல், குடும்ப அட்டை நகல், தையல் பயின்ற சான்று மற்றும் புகைப்படம் (2) ஆகியவை மாவட்ட மாற்றுத்திறனாளிகள் நல அலுவலகத்தில் விண்ணப்பித்து பயன்பெறலாம். மேலும் விவரங்களுக்கு மாவட்ட மாற்றுத்திறனாளிகள் அலுவலக தொலைபேசி எண்:0461-2340626-ல் தொடர்பு கொள்ளலாம் என மாவட்ட ஆட்சியர் டாக்டர் கி.செந்தில் ராஜ்,  தெரிவித்துள்ளார்.