காதல் விவகாரத்தில் மாணவி தற்கொலை: மாணவர் வீட்டை சேதப்படுத்தியவர்கள் மீது வழக்கு

ஆறுமுகனேரி அருகே காதல் விவகாரத்தில் மாணவி தற்கொலை செய்தார். இதையடுத்து மாணவர் வீட்டை சேதப்படுத்திய கும்பல் மீது போலீசார் வழக்குப் பதிந்து விசாரித்து வருகின்றனர்.

தூத்துக்குடி மாவட்டம், காயல்பட்டினம் மங்களவாடி சள்ளித்திரடு பகுதியைச் சேர்ந்தவர் ராஜ். இவருக்கு இரு மகள்கள். பிளஸ் 2 முடித்து விட்டு வீட்டில் இருந்து வந்த இவரது மகள் கெளரியும் (19), அதே பகுதியைச் சேர்ந்த கல்லூரி மாணவர் சந்துருவும் காதலித்து வந்தனராம். அதை பெற்றோர்கள் கண்டித்துள்ளனர். இந்நிலையில் கெளரி தீக்குளித்ததையடுத்து, தூத்துக்குடி அரசு மருத்துவமனையில் அனுமதிக்கப்பட்ட அவர், அங்கு உயிரிழந்தார். 

இதுகுறித்து ஆறுமுகனேரி போலீசார் வழக்குப் பதிந்து சந்துருவை நேற்று கைது செய்து விசாரித்து வருகின்றனர். இதற்கிடையே 7 பேர் கொண்ட கும்பல் சந்துரு வீட்டுக்குள் புகுந்து வீட்டின் இருந்த பொருள்களை சேதப்படுத்தினராம். இதுகுறித்த புகாரின்பேரில் போலீசார் வழக்குப் பதிந்து விசாரித்து வருகின்றனர்.