நவ.21-ல் மது விற்பனைக்கு தடை: ஆட்சியர் அறிவிப்பு

மிலாடி நபி பண்டிகையை முன்னிட்டு வருகிற 21ம் தேதி தூத்துக்குடி மாவட்டத்திலுள்ள மதுபானக் கடைகள் அனைத்தையும் மூட மாவட்ட ஆட்சியர் சந்தீப் நந்தூரி உத்தரவிட்டுள்ளார்.

இது தொடர்பாக ஆட்சியர் வெளியிட்டுள்ள செய்திக்குறிப்பு: தூத்துக்குடி மாவட்டத்தில் நபிகள் நாயகம் பிறந்த தினமான மிலாடி நபி பண்டிகைக்காக தமிழக அரசால் மதுபான விற்பனை தடை செய்யப்பட்டுள்ள 21.11.2018 அன்று தமிழ்நாடு மதுபான சில்லறை விற்பனை ( கடை / பார் ) விதிகள் 2003 விதி 12 துணை விதி (1)-ன் படி தூத்துக்குடி மாவட்டத்திலுள்ள டாஸ்மாக் மதுபானக் கடைகள், அதனுடன் இணைந்த மதுக்கூடங்கள் மற்றும் அனைத்து எப்.எல்.2., மற்றும் எப்.எல்.3 உரிமதலங்களில் அமைந்துள்ள மதுக்கூடங்கள் அனைத்தும் மூடப்பட்டிருக்க வேண்டும்.

மேற்குறிப்பிட்ட தினத்தில் மதுபான விற்பனை, மதுபானத்தை ஓரிடத்திலிருந்து மற்றொரு இடத்திற்கு கடத்துதல், மதுபானத்தை பதுக்கி வைத்தல் போன்ற செயல்கள் கண்டறியப்பட்டால் சம்மந்தப்பட்ட நபர்கள் மீது தமிழ்நாடு மதுவிலக்கு அமலாக்கச் சட்டத்தின்கீழ் குற்றவியல் நடவடிக்கை மேற்கொள்ளப்படும் என மாவட்ட ஆட்சியர் சந்தீப் நந்தூரி தெரிவித்துள்ளார்.