டிடிவி தினகரன் ஒதுங்கியிருக்கிறார்.. விலகவில்லை: தூத்துக்குடியில் அமைச்சர் கடம்பூர் செ.ராஜூ பேட்டி

அதிமுகவில் இருந்து டிடிவி தினகரன் ஒதுங்கி இருப்பதாகத்தான் அறிவித்துள்ளார். அவர் விலகவில்லை என அமைச்சர் கடம்பூர் செ.ராஜூ கூறினார்.

தூத்துக்குடி மாவட்ட ஆட்சியர் அலுவலக வளாகத்தில் இன்று செய்தியாளர்களுக்கு பேட்டியளித்த அமைச்சர் கடம்பூர் செ.ராஜூ கூறியதாவது : தமிழகத்தில், 122 எம்எல்ஏக்கள் ஆதரவுடன் அம்மாவின் நல்லாட்சி நடந்து வருகிறது. நான் இல்லாவிட்டாலும், எனது ஆட்சி சிறப்பாக நடைபெறும் என்று புரட்சித் தலைவி அம்மா தெரிவித்தார். இது மெஜாரிட்டி ஆட்சி என்பதால் யாரிடமும் பேச்சுவார்ததை நடத்தி ஆதரவு கோர வேண்டிய அவசியம் இல்லை. 

எம்ஜிஆர் இறந்தபோது கட்சி பிளவுபட்டு, இரட்டை இலை சின்னம் முடக்கப்பட்டது. அப்போது அம்மா இரு அணிகளையும் சேர்த்து, சின்னத்தை மீட்டார்கள். தற்போது இரண்டு அணிகளும் இணைய பேச்சுவார்த்தை நடந்து வருகிறது. ஒன்றுபட்டு இரட்டை இலையை மீட்போம். டிடிவி தினகரன் கட்சியை விட்டு ஒதுக்கி இருப்பதாகத்தான் அறிவித்துள்ளார். ஆனால் அவர் துணைச் செயலாளர் பதவியில் நீடிப்பார். இரு அணிகளும் ஒன்று சேர்வதற்காகவே அவர் பெருந்தன்மையுடன் சற்று ஒதுங்கி இருப்பதாக அவர் அமைச்சர் கடம்பூர் செ.ராஜூ தெரிவித்தார்.