தூத்துக்குடியில் 4–வது குடிநீர் திட்டப் பணிகளை ஆய்வு

தூத்துக்குடி மாநகராட்சியில்  4–வது குடிநீர் குழாய் திட்டப்பணிகளை சென்னை உயர் அதிகாரிகள் குழுவினர் நேற்று ஆய்வு செய்தனர்.

தூத்துக்குடி மாநகராட்சியின் குடிநீர் தேவையை பூர்த்தி செய்யும் வகையில் 4–வது குடிநீர் குழாய் திட்டம் ரூ.282.44 கோடி செலவில் செயல்படுத்தப்பட்டு வருகிறது. இதே போன்று ரூ.76 கோடி செலவில் மழைநீர் வடிகால் அமைக்கப்பட உள்ளது. பாதாள சாக்கடை திட்டத்தில், சுத்திகரிப்பு நிலையம் அமைக்கும் பணியும் நடைபெற உள்ளது. இந்த பணிகள் தமிழ்நாடு நகர்ப்புற உட்கட்டமைப்பு நிதி சேவை நிறுவனத்தின் நிதியுதவியுடன் நடந்து வருகிறது.

இதைத் தொடர்ந்து சென்னையில் இருந்து தமிழ்நாடு நகர்ப்புற உட்கட்டமைப்பு நிதி சேவை நிறுவனத்தின் முதுநிலை உதவி துணைத்தலைவர் ராஜேந்திரன் தலைமையில் 7 பேர் அடங்கிய அதிகாரிகள் குழுவினர் நேற்று தூத்துக்குடிக்கு வந்தனர். அவர்கள் 4–வது குடிநீர் குழாய் திட்டம், பாதாள சாக்கடை திட்டம், மழைநீர் வடிகால் திட்டம் ஆகியவற்றை பார்வையிட்டு ஆய்வு செய்தனர். இந்த பணிகளை விரைந்து முடிக்க உரிய நடவடிக்கை எடுக்குமாறு வலியுறுத்தினர். மாலையில் மாநகராட்சி ஆணையர் ராஜாமணியுடன் ஆலோசனை நடத்தினர். ஆய்வின் போது தூத்துக்குடி மாநகராட்சி பொறியாளர் லட்சுமணன், உதவி ஆணையர்கள் சரவணன், பிரின்ஸ் மற்றும் அதிகாரிகள் உடன் இருந்தனர்.