காந்திக்கு எதிராக துண்டு பிரசுரம் விநியோகம்: கோட்சே ஆதரவாளர்கள் மீது வழக்குப்பதிவு

மகாத்மா காந்திக்கு எதிராக வாசகங்கள் அடங்கிய துண்டு பிரசுரம் விநியோகித்த கோட்சே ஆதரவாளர்கள் மீது மத்தியப் பிரதேச போலீசார் வழக்குப் பதிவு செய்துள்ளனர்.

இந்தியா சுதந்திரம் பெற்றதிலிருந்து குவாலியர் நகரம் இந்து மகாசபா நடவடிக்கைகளில் ஒரு முக்கிய மையமாக இருந்து வருகிறது. மேலும், குவாலியரில் உள்ள இந்து மகாசபா ஆர்வலர்கள் பல ஆண்டுகளாக கோட்சேவை வணங்கி வருகின்றனர். கடந்த 2017ம் ஆண்டு குவாலியரில் அவரது சிலையை நிறுவ முயன்றனர். ஆனால் மாவட்ட நிர்வாகம் அந்த சிலையைக் கைப்பற்றி சிலை நிறுவுவதற்கு தடை விதித்தது.

இந்நிலையில், நாதுராம் கோட்சேவின் 70வது தியாக நாளில் ((நவம்பர் 15, 1949),  (15.11.2019, வெள்ளிக்கிழமை) அவரது செயற்பாட்டாளர்கள் கோட்சேவை வணங்கியதோடு,  மகாத்மா காந்தியை இழிவுபடுத்தும் துண்டு பிரசுரங்களை விநியோகித்துள்ளனர். காங்கிரஸ் ஆர்வலர் ரவீந்திர சவுஹான் அளித்த புகாரின் பேரில் மத்தியப்பிரதேச காவல்துறையினர் வழக்குப்பதிவு செய்துள்ளனர். துண்டு பிரசுரங்களை விநியோகித்த நபர்களை கைது செய்யும் முயற்சியில் குவாலியர் போலீஸார் ஈடுபட்டுள்ளனர் என மாநில சட்டத்துறை அமைச்சர் பி.சி. சர்மா தெரிவித்துள்ளார்.